पेण: पहिल्याच पावसात तासंतास विद्युत पुरवठा (Electricity) खंडित होत असल्याने सर्वसामान्य नागरिकांचे जिणे हैराण झाले आहे. संतप्त झालेल्या वीज ग्राहकांचे प्रश्न मांडण्याकरिता शिवसेनेचे पेण पनवेल कर्जत संपर्कप्रमुख प्रसाद भोईर व पेण तालुका प्रमुख समीर म्हात्रे यांच्या नेतृत्वात शिवसेनेच्या शिष्टमंडळाने महावितरण कार्यालयावर धडक देऊन अधिकाऱ्यांना जाब विचारला.
कोकण आपत्ती समीकरणांतर्गत कोकण विभागातील सर्व वीज वाहिन्या भूमिगत करायचे काम अपूर्ण अवस्थेत असल्याने उघड्या वाहिन्यांमुळे अपघात होऊन जैविक हानी होण्याची शक्यता असल्याने वीज वाहिन्या भूमिगत करण्याचे काम तातडीने करण्यात यावे अशी मागणी सुद्धा यावेळी करण्यात आली.वीज ग्राहकांच्या समस्या सोडवून विद्युत पुरवठा सुरळीत न झाल्यास 5 जून नंतर शिवसेना स्टाईलने आंदोलन करण्यात येईल असा इशारा यावेळी देण्यात आला.
या आंदोलनात शिवसेनेचे पेण पनवेल कर्जत संपर्कप्रमुख प्रसाद भोईर, समन्वयक नरेश गावंड, माजी सभापती संजय भोईर, पेण तालुका प्रमुख समीर म्हात्रे, घनश्याम कुथे, महिला आघाडीच्या दीपश्री पोटफोडे, युवा सेनेचे सुधीर ढाणे, चेतन मोकल, भगवान पाटील, राजू पाटील, वसंत म्हात्रे, दर्शना जवके, महानंदा तांडेल, मेघना चव्हाण, सुरेखा तांडेल, लव्हेंद्र मोकल, शिवाजी म्हात्रे, चंद्रहास म्हात्रे, विनोद म्हात्रे यांच्यासह शिवसैनिक मोठ्या संख्येने उपस्थित होते.
प्रमुख मागण्या
जिर्ण झालेले विद्युत पोल बदलून नवीन पोलची उभारणे
पोलवरील नादुरुस्त झालेल्या फॅब्रिकेशनची दुरुस्ती त्वरीत करावी
विद्युत पुरवठा करणाऱ्या खराब झालेल्या तारा बदलून नवीन विद्युत तारा बदलून ग्राहकांना अखंडीतपणे विज पुरवठा करावा.
विद्युत ग्राहकांच्या तकारी घेण्यांसाठी व तक्रारींचे निवारण करण्यांसाठी कायम स्वरुपी कर्मचाऱ्यांची नेमणूक करावी
नवीन विद्युत कनेक्शन हे कमीत कमी खर्चाने मिळावे
ग्राहकांचे जळालेले मिटर किंवा बंद पडलेले मिटर हे खात्यामार्फत मोफत बद्बलून मिळावे.
