मुंबई आणि बदलापूरला मेट्रोने (Metro) जोडण्यासाठी मुंबई महानगर प्रदेश विकास प्राधिकरणाने (एमएमआरडीए) कांजूरमार्ग ते बदलापूर या मेट्रो १४ मार्गिकेचा प्रस्ताव तयार केला आहे. ही मार्गिका ३८ किमी लांबीची असून, लवकरच तिच्या प्रत्यक्ष कामाला गती मिळण्याची शक्यता आहे. या प्रकल्पाच्या पर्यावरणीय परवानग्या मिळवण्यासाठी आणि आवश्यक अहवाल तयार करण्यासाठी एमएमआरडीएने सल्लागार नियुक्त करण्याचा निर्णय घेतला आहे. बुधवारी यासाठी निविदा जाहीर करण्यात आली असून, एकदा सल्लागाराची नियुक्ती झाल्यानंतर पुढील वर्षभरात काम सुरू होण्याची शक्यता आहे.
मुंबई-बदलापूर मेट्रो मार्ग सुरू झाल्यानंतर प्रवाशांना मोठा दिलासा मिळणार आहे. सध्या या दोन ठिकाणांदरम्यान प्रवासासाठी १.५ ते २ तासांचा कालावधी लागतो, पण मेट्रो सुरू झाल्यानंतर हा प्रवास काही मिनिटांत पूर्ण होईल. त्यामुळे मुंबईत काम करणाऱ्या बदलापूरकरांसाठी ही मोठी सुविधा ठरणार आहे. मात्र, हा मार्ग ठाणे खाडी, पारसिक हिल आणि फ्लेमिंगो अभयारण्यातून जाणार असल्याने पर्यावरण परवानगी घेणे बंधनकारक आहे. यासाठी एमएमआरडीएने पर्यावरणीय प्रभाव अहवाल तयार करण्याची प्रक्रिया सुरू केली आहे.
मेट्रो मार्गिकेचा सविस्तर प्रकल्प अहवाल (DPR) मिलान मेट्रो कंपनीने तयार केला असून, आयआयटी मुंबईने त्याला मान्यता दिली आहे. आता राज्य सरकारची अंतिम मंजुरी मिळाल्यानंतर प्रत्यक्ष बांधकाम सुरू होईल. एकूणच, मेट्रो १४ मार्गिकेच्या कामास लवकरच सुरुवात होणार आहे आणि बदलापूरकरांचे मेट्रोचे स्वप्न लवकरच पूर्ण होईल
