पहलगाम (Pahalgam) हल्ल्यात २८ निष्पाप नागरिकांचा मृत्यू झाल्यानंतर देशभरात संतापाची लाट उसळली आहे. पर्यटनासाठी गेलेल्या नागरिकांना गोळ्या घालण्यात आल्या. त्यामुळे देशभरात संतापाची लाट पसरली आहे. अनेक ठिकाणी निदर्शने होत आहेत. दहशतवाद्यांना कठोर शिक्षा देण्याची मागणी होत असतानाच. अशा भयावह वातावरणात बीसीसीआयने एक मोठे पाऊल उचलले आहे.
आयपीएल स्पर्धेदरम्यान चार मोठे निर्णय घेण्यात आले आहेत. दोन गोष्टींवर बंदी घालण्याचा निर्णयही घेतला आहे. या निर्णयाचा थेट परिणाम मुंबई इंडियन्स आणि सनरायझर्स हैदराबाद सामन्यावर दिसून येईल. हा सामना २३ एप्रिल रोजी होणार आहे. सध्याची परिस्थिती लक्षात घेता बीसीसीआयने दोन गोष्टींवर बंदी घातली आहे. एक म्हणजे सामन्यात चीअरलीडर्स नाचताना दिसणार नाहीत.
दुसरे म्हणजे सामन्यादरम्यान फटाके वाजवता येणार नाहीत. २३ एप्रिल रोजी होणाऱ्या मुंबई इंडियन्स विरुद्ध सनरायझर्स हैदराबाद सामन्यासाठी बीसीसीआयने या गोष्टींवर बंदी घालण्याचा निर्णय घेतला आहे.
चीअरलीडर्स आणि फटाक्यांवर बंदी घालण्याव्यतिरिक्त, बीसीसीआयने आणखी दोन निर्णय घेतले आहेत. एक म्हणजे २३ एप्रिल रोजी दोन्ही संघांचे खेळाडू आणि सर्व पंच हातावर काळ्या पट्टी बांधतील. तसेच, या सामन्यापूर्वी दोन्ही संघ एक मिनिट मौन पाळतील.
दहशतवादी हल्ल्यानंतर, बीसीसीआयने आधीच पाकिस्तानविरुद्ध कडक पावले उचलली आहेत. टीम इंडिया पाकिस्तानला जात नाही आणि पाकिस्तानविरुद्ध मालिका खेळत नाही. आयसीसी स्पर्धांमध्ये दोन्ही संघ आमनेसामने येतात. आयपीएल स्पर्धेत पाकिस्तानी खेळाडूंवर आधीच बंदी घालण्यात आली आहे.
जम्मू आणि काश्मीरमधील पहलगाममध्ये दहशतवाद्यांनी २८ निष्पाप पर्यटकांची हत्या केली. यावेळी त्यांचा धर्म विचारून त्यांना गोळ्या घालून ठार मारण्यात आले. पोलिसांचा गणवेश घालून दहशतवादी पर्यटनस्थळाभोवती फिरत होते. यामुळे पर्यटकांना काहीही संशय आला नाही. त्यानंतर त्यांनी क्रूर कृत्य केले. पहलगाममधील हल्ल्याचा सर्वत्र निषेध केला जात आहे. दरम्यान, पंतप्रधान नरेंद्र मोदी यांनी म्हटले आहे की हल्ल्यातील गुन्हेगारांना सोडले जाणार नाही.
दुसरीकडे, आयपीएल स्पर्धेत प्लेऑफची शर्यत घट्ट झाली आहे. यामुळे, मुंबई इंडियन्स आणि सनरायझर्स हैदराबाद या दोन्ही संघांसाठी विजय महत्त्वाचा आहे. जर मुंबईने हा सामना मोठ्या फरकाने जिंकला तर त्यांना टॉप ४ मध्ये स्थान मिळेल. त्यामुळे, स्पर्धेत आपले आव्हान टिकवून ठेवण्यासाठी सनरायझर्स हैदराबादला मुंबईला हरवणे आवश्यक आहे.
