राज्यातील शेतकरी, नागरिक, मच्छीमार आणि सर्वसामान्यांसाठी हवामान खात्याकडून (Rain Update) एक महत्त्वाची माहिती समोर आली आहे. महाराष्ट्रात मान्सून वेळेपूर्वीच दाखल झाला होता, पण नंतर त्याने विश्रांती घेतली. त्यानंतरही राज्यात अपेक्षित तीव्रता दिसून आली नाही. तथापि, आता पुन्हा एकदा पावसाबाबत एक मोठी आणि दिलासादायक माहिती मिळाली आहे.
हवामान खात्याने दिलेल्या माहितीनुसार, १२ ते १५ जून दरम्यान कोकण, गोवा, मध्य महाराष्ट्र, मराठवाडा आणि दक्षिण भारतातील काही भागात मुसळधार पाऊस पडण्याची शक्यता आहे. त्यानंतर १५ जूननंतर राज्यात मान्सून पूर्णपणे सक्रिय होण्याची शक्यता आहे. त्यामुळे, कृषी विभागाने शेतकऱ्यांना पेरणीची घाई करू नये असा सल्ला दिला आहे. राज्य मंत्रिमंडळाच्या नुकत्याच झालेल्या बैठकीत मान्सून, धरणांमधील पाणीसाठा, पीक पाणी योजना, खतांचा साठा आणि बियाण्यांची उपलब्धता याबाबत आढावा घेण्यात आला. मुख्यमंत्री देवेंद्र फडणवीस यांच्या अध्यक्षतेखाली झालेल्या या बैठकीत राज्यातील पेरणी, हवामान, खत पुरवठा आणि शेतीबाबत उपलब्ध माहिती सादर केली. त्यांच्या मते, महाराष्ट्रातील फक्त १७ जिल्ह्यांमध्ये २५ टक्क्यांपेक्षा कमी पाऊस पडला आहे, १२ जिल्ह्यांमध्ये २५ ते ५० टक्के, ४ जिल्ह्यांमध्ये ५० ते ७५ टक्के आणि फक्त एका जिल्ह्यात १०० टक्क्यांपेक्षा जास्त पाऊस पडला आहे. त्यामुळे संपूर्ण राज्यातील हवामान अजूनही पेरणीसाठी पूर्णपणे अनुकूल नाही.
विशेष म्हणजे, १२ ते १५ जून दरम्यान कोकण आणि गोव्यात मुसळधार पावसाची शक्यता आहे. हवामान खात्याने १३ आणि १४ जून रोजी अत्यंत मुसळधार पावसाचा अंदाज वर्तवला आहे. मध्य महाराष्ट्रात १२ ते १५ जून दरम्यान काही भागात आणि मराठवाड्यात १२ ते १४ जून दरम्यान पावसाची शक्यता व्यक्त करण्यात आली आहे. त्यामुळे १५ जून नंतरच हे वातावरण पेरणीसाठी योग्य होण्याची शक्यता अधिक ठोस असेल. कृषी विभागाने स्पष्ट केले. शेतकऱ्यांसाठी हा काळ खूप महत्त्वाचा आहे. पावसाची वाट पाहणाऱ्या शेतकऱ्यांनी आता १५ जून नंतरच पेरणी करण्याचा निर्णय घेतला तर ते अधिक फायदेशीर ठरेल. हवामान खात्याच्या अंदाजानुसार पावसाची तीव्रता वाढत असल्याने, येत्या आठवड्यात राज्यभर शेतीची कामे वेगात येण्याची शक्यता नाकारता येत नाही.
