डोंबिवली ( शंकर जाधव )
विधानसभा निकालानंतर पहिल्यांदाच मनसे अध्यक्ष राज ठाकरे (Raj Thackrey) यांनी कार्यकर्ता मेळाव्यात ईव्हीएम मशीनबाबत शंका उपस्थित करत, कल्याण ग्रामीणचे माजी आमदार प्रमोद उर्फ राजू पाटील (Raju Patil) यांना त्यांच्या गावी एकही मत मिळाले नसल्याचा दावा केला. मात्र, त्यांच्या या विधानावर आता स्थानिक शिवसेना शिंदे गटाच्या कार्यकर्त्यांनी तीव्र प्रतिवाद केला आहे.
राजू पाटील यांच्या काटई गावातील शिवसैनिकांनी निवडणूक आयोगाच्या फॉर्म नंबर 20 मधील अधिकृत माहिती सोशल मीडियावर व्हायरल करत, “राज ठाकरे यांना चुकीची माहिती कोणी पुरवली?” असा थेट सवाल उपस्थित केला आहे तर शिवसेना शिंदे गटाचे पदाधिकारी अर्जुन पाटील याच्या मते कल्याण ग्रामीण मतदारसंघातील काटई गावात एकूण 1,470 मतदार आहेत. येथे निवडणुकीसाठी तीन मतदान केंद्रे उभारण्यात आली होती.
निवडणूक आयोगाच्या अधिकृत माहितीनुसार, राजू पाटील यांना त्यांच्या गावात मिळालेली मते पुढीलप्रमाणे आहेत: 353 क्रमांकाचे मतदान केंद्र: राजू पाटील – 260 मते राजेश मोरे – 183 मते 354 क्रमांकाचे मतदान केंद्र: राजू पाटील – 269 मते राजेश मोरे – 205 मते 355 क्रमांकाचे मतदान केंद्र: राजू पाटील – 154 मते राजेश मोरे – 151 मते एकूण निकाल: ✅ राजू पाटील – 683 मते ✅ राजेश मोरे – 539 मते ✅ राजू पाटील यांना त्यांच्या गावात 144 मतांची आघाडी शिवसैनिकांचा सवाल: या अधिकृत आकडेवारीनुसार, “राजू पाटील यांना त्यांच्या गावातून शून्य मते मिळाली” हा दावा चुकीचा ठरतो त्यामुळे ही चुकीची माहिती राज ठाकरे यांच्यापर्यंत कोणी आणि का पोहोचवली? यावर आता राजकीय वादंग निर्माण झाले आहे.
