आजच्या काळात होम लोन, पर्सनल लोन, किंवा कार लोन घेणं खूप सामान्य झालं आहे. पण काही वेळा अचानक आर्थिक गरज भासते आणि नवीन लोन घेण्याची झंझट नको असते. अशा परिस्थितीत टॉप-अप लोन (Top-up Loan) हा एक उत्तम पर्याय ठरतो.
टॉप-अप लोन म्हणजे काय?
टॉप-अप लोन म्हणजे अतिरिक्त लोन, जे तुम्हाला तुमच्या विद्यमान लोनवर मिळते. यासाठी तुम्हाला नवीन लोन प्रोसेस पूर्ण करावी लागत नाही, कारण तुम्ही आधीच एक लोन घेतलेलं असतं.समजा, तुम्ही 20 लाखांचे होम लोन घेतले आहे आणि नियमित EMI भरत आहात. आता तुम्हाला 5 लाख रुपयांची गरज आहे, तर तुम्ही टॉप-अप लोन घेऊ शकता.
टॉप-अप लोनसाठी पात्रता
टॉप-अप लोन मिळवण्यासाठी तुमची क्रेडिट हिस्ट्री चांगली असावी, म्हणजेच तुम्ही तुमच्या विद्यमान लोनचे हफ्ते वेळेवर भरले असले पाहिजेत. जर तुम्ही वेळच्या वेळी EMI भरत असाल, तर बँक किंवा वित्तीय संस्था तुम्हाला अधिक विश्वासाने टॉप-अप लोन मंजूर करू शकते. यासाठी तुमचा क्रेडिट स्कोअर 750 किंवा त्याहून अधिक असावा, कारण उच्च क्रेडिट स्कोअर असल्यास लोन सहज मंजूर होतं आणि कमी व्याजदराने मिळू शकतं.
तुमच्या विद्यमान लोनच्या तारणाच्या (collateral) मूल्यावर टॉप-अप लोन अवलंबून असतं. उदाहरणार्थ, जर तुम्ही गृहकर्ज घेतले असेल आणि तुमच्या घराची बाजारातील किंमत जास्त असेल, तर तुम्हाला जास्त टॉप-अप लोन मिळण्याची शक्यता असते. त्याचप्रमाणे, जर तुम्ही तुमचं लोन नियमितपणे फेडत असाल आणि तुमच्यावर अजून मोठं कर्ज उरलेलं नसेल, तर बँक तुमचं अर्ज सहज मंजूर करू शकते.
टॉप-अप लोनचे फायदे:
- नवीन लोनपेक्षा फास्ट प्रोसेसिंग होते.
- पर्सनल लोनच्या तुलनेत स्वस्त असतो.
- घराच्या रेनोव्हेशनसाठी, मेडिकल इमर्जन्सीसाठी, किंवा शिक्षणासाठी वापरता येतो.
- विद्यमान लोनमध्येच समाविष्ट करता येतो, त्यामुळे वेगळे EMI भरावे लागत नाहीत.
- जर तुमच्या संपत्तीचे मूल्य जास्त असेल, तर अधिक रक्कम मिळू शकते.
टॉप-अप लोन घेताना लक्षात ठेवायच्या गोष्टी
टॉप-अप लोन घेताना सर्वप्रथम तुम्हाला परतफेड करण्याची क्षमता (Repayment Capacity) तपासावी लागेल. लोन घेताना आकर्षक ऑफर्स दिसतात, पण त्याची परतफेड करणे तुमच्या आर्थिक स्थितीला योग्य आहे का, हे आधी ठरवा. कारण जास्त कर्ज घेतल्याने आर्थिक ताण येऊ शकतो. यासोबतच, नवीन EMI किती येईल, हे आधीच कॅल्क्युलेट करा. जर तुमचं विद्यमान लोन आधीच मोठं असेल आणि त्यात आणखी EMI वाढवला, तर तुमच्या महिन्याच्या बजेटवर परिणाम होऊ शकतो. टॉप-अप लोन घेण्याआधी ते योग्य कारणासाठी घेत आहात का, याचा विचार करा. फक्त सहज उपलब्ध आहे म्हणून किंवा अनावश्यक खर्चासाठी हे लोन घेणं टाळा. हे कर्ज तुमच्या गरजेपुरतंच असावं आणि तुम्हाला भविष्यात त्याचा आर्थिक बोजा जाणवू नये.
टॉप-अप लोन कसं घ्यायचं?
टॉप-अप लोन घेण्यासाठी सर्वप्रथम तुमच्या विद्यमान बँकेत किंवा वित्तीय संस्थेत संपर्क साधा, कारण तुम्ही ज्या बँकेत आधीच लोन घेतलं आहे, तीच बँक तुम्हाला टॉप-अप लोन देण्याची जास्त शक्यता असते. त्यानंतर बँक तुमच्या लोनची पात्रता (Eligibility) तपासेल. यात तुमचं क्रेडिट स्कोअर, विद्यमान लोनचं रीपेमेंट हिस्ट्री, तारणाची उपलब्धता आणि तुमची आर्थिक क्षमता यांचा विचार केला जातो. जर तुम्ही पात्र असाल, तर तुम्हाला काही आवश्यक कागदपत्रं जमा करावी लागतात. यामध्ये ओळखपत्र (PAN कार्ड, आधार कार्ड), उत्पन्नाचे पुरावे (Salary Slip किंवा ITR), आणि विद्यमान लोनचे तपशील यांचा समावेश असतो. काही बँका अतिरिक्त कागदपत्रं मागू शकतात, त्यामुळे तुमच्या बँकेच्या अटी जाणून घ्या.
कागदपत्रं सादर केल्यानंतर, बँक लोन मंजुरीसाठी प्रक्रिया सुरू करते, जी काही दिवसांत पूर्ण होते. तुमचं क्रेडिट स्कोअर चांगलं असेल आणि पूर्वीचे EMI नियमित भरले असतील, तर मंजुरी लवकर मिळण्याची शक्यता असते. एकदा लोन मंजूर झालं की, रक्कम तुमच्या बँक खात्यात जमा केली जाते, आणि तुम्ही ती गरजेनुसार वापरू शकता.
